Love in Autumn

[cwjmemdub]

The color is changing
My heart is crying
My soul is lost
You're the cause

The leaves are falling
The trees are tripping
I'm shaking
Cause I feel like I'm loosing

The person of my life
Whom I want to be my wife
So we can grow old together
And our love lasts forever

You're always in my dream
And in the bore that I ream
Right at the center of my heart
Every second we never part

[cwjmemdub]

Nplooj twb daj
No ntxuj ntxiag rau kuv lub siab suab thaj
Nplooj twb yuav poob
Kuv thiaj quaj seev rau txhua lub roob
Hu kuv me nkauj muam tus zoo lus
Saib koj puas tseem nco koj me leej nus

Ib lub xyoo dhau mus lawm ib lub caij
Kuv siab puas tsus thiaj li saub tuaj taij
Kom koj rov los nyob ntawm kuv ib sab
Kuv tseem nyob tos tuav koj txhais me npab
Yuav puag koj rau hauv xubntiag tsis pub ncaim lawm
Seb lub siab quaj puas ntsiag tauv tau lub kua muag tsis tawm

Yog dhau lub caij nplooj ntoos zeeg koj puas yuav los kom txog ua ntej ntuj no
Yog koj hnov koj lub siab deeg ces twb yog kuv nco nco
Xav tau koj los puag hauv kuv lub me xubntiag
Thiaj xa kuv lub plawv tuaj cuag nrog koj lub ua ke ntxwb ntxiag
Yuav hlub koj kom kawg thiab hlub ib leeg xwb
Yog txog caij ntuj no koj tsis los ces ntshe kuv lub plawv yuav tawg thiab yuav xwb os mog

[Nkaujntxheedej]

Caij nplooj ntoos pib zeeg
Nyob ib leeg kho siab khuav
Tus npau suav ua lub neej nrog koj
Tsis ploj sawv nraim hauv nruab siab
Kua muag iab tawm los tsis tu
Vim koj tu wb moo tsis hais ib los
Tseem niaj hnub tos seb koj puas rov los
Rov los tos kuv mus ua koj sev
Tshuav tsis ntev lub caij ntuj no
Twb tawm los txog kuv tseem nco
Ntsoov hmo wb zaum uake saib hnub qub
Tias tsis muaj hnub koj ncaim kuv mus
Vim kuv yog tus koj hlub tshaj
Qab zib baum suab thaj koj noj tag los xav noj dua
Thiaj rov tuaj nqua seb koj puas tseem nco
Txog hmo wb tau cog wb txoj kev hlub
Yuav nyob ua khub mus txog hnub laus

[cwjmemdub]

Kuv tseem nco ntsoov wb tus npau suav tsis ploj
Muab plawv sib zoj cia rau saum lub hli
Lub hnubqub ci ntsa mus txhua qhov
Tseem niaj hnub thov kom Yawm Saub
Nrog pom paub wb txoj kev sib hlub
Hauv tus npau ntub tau tso koj tseg
Tiamsis tsis tau veg txoj kev txij nkawm
Koj kua muag iab tawm kuv siab thiaj mob
Tshaj muaj pos chob thiab hluav taws hlawv
Wb daim ntawv cia muab sau dua
Kom nws tua txoj kev kho siab
Hlub ib txhiab yeej tau cog lus
Hlub koj mus kom tsis muaj ntuj
Rov los tsuj wb tus lw tshua
Los sib sua ua ib lub neej
Yog peem tsheej wb txoj kev hlub
Yuav tsis pub sib ncaim ntxiv lawm
Lub sijhawm kuv sau ntawv no
Kua muag ntws nto nco nco koj os me qabzib

[Nkaujntxheedej]

Tus duab nyob saum lub hli
Wb tau khi wb ob lub siab
Nyob pua txhiab tsis muaj hnub plam
Thiaj seev tham hmo no nrog lub hli
Seb puas hnov lus ntxhi los ntawm koj
Kuv siav loj zog tuaj thaum pom dheev koj
Paub zoo tias koj tseem yog tus qub
Tus kuv hlub los lawm ntev
Txawm wb ncaim mus ib ncuas kev
Los txoj kev wb tau tho tseg
Koj tsis veg kuv tseem tos hlub
Yuav hlub koj ib leeg mus tag tiam no
Siav tsis rho tsis muaj hnub nrug mus
Tej lus zoo thiab phem los wb yeej hais
Thiaj tau pais thov yawm saub
Kom nrog wb paub txog wb txoj kev hlub
Lub ntuj thiaj pub wb rov los sib hlub dua zaum ob
Thov nrog kuv nyob tsis txhob ncaim kuv mus lawm mog
Tej lus wb cog thov khaws cim ntsoov
Yeej yog wb hmoov nqa daim ntawv los ua txij nkawm
Lub sijhawm thiaj tseem rov muaj pub rau wb dua mog tus hlub

[cwjmemdub]

Nplooj daj cia nplooj zeeg
Kuv hlub koj tshaj thov koj ntseeg
Nplooj txawm poob tag tshuav ntoo qhuav
Ntuj qhib tshiab los nag nplooj yuav rov nthuav
Thaum paj tawg tsw qab ntxiag
Yog wb caij sib qawg quaj tsis ntsiag
Vim kev sib nco tseg tsis taus
Ua hnub hmo ywg dej kom tuaj kaus
Ua ntej yuav no yuav coj koj mus nrog kuv nyob
Siab thiaj tsis po plawv thiaj tsis pob
Vim muaj koj ua qhov chaw sov
Nrog kuv sib ntoj thiab sib zov
Txoj kev sib tawb tsis paub dhuav
Zoo li nplooj tsawb nplaum lub ncuav
Sib hlub zaum ob hlub kom tshaj yav tas los
Tsuas muaj paj tsis muaj pos
Yog lub hli tsis nra koj ntsia tsis pom
Thov cua tshuab kom huab ya es ua zoo tsom
Yog pom zem zuag ces koj yeej hnov
Kuv lub suab luag lub siab sov
Tias nco nco me nkauj Hmoob tus dai siab
Tuaj quaj qhoob ntuj thiaj pos huab niab
Muab koj tus pa hnia rau cua xa
Tuaj rau kuv cia nrog kuv txoj pa ua ke mog nkauj Hmoob dai siab

[cwjmemdub]

Lub caij no nplooj ntoo daj rwb rhuv
Me nkauj Hmoob koj puas nco kuv
Lub siab quaj duj dhi
Nco ntsoov wb tej lus sib ntxhi
Pom me nplooj poob daj vog
Kuv kua muag poob kua muag nrog
Tsis muaj hnub yuav tshem tau koj hauv kuv nplooj siab
Vim kuv twb hlub koj los lawm ntau txhiab
Puas yog tsov txaij nraum coj koj lawm
Nuj Nplaib thiaj nrhiav tsis pom ntxawm
Mus txog wb lub chaw tshua
Pom tas lawm niag Mab niag Sua
Sib tuaj tes rwb rawv
Kuv siab mob cuag hluav taws hlawv
Yuav ua cas ua lub neej tsis muaj koj
Nyob ib leeg tsis muaj tus los txhoj
Los tawb sib de nkuj nki
Li yav ntuj thaum i
Kuv hlub koj os tus neeg dai siab
Txhob ncaim ntev ntev tsam kuv plawv kub nyhiab
Koj los txog ntshe tsuas tshuav lub cev qhuav
Tus ntsuj plig ces ntshe twb zaum tsaws xuav
Nrov luj loos saum kev khaub lig
Hu npaum cas los yuav tsis tig
Vim tawb mus dhau ciam dej ciam av
Hmoob noob neej noob tsav nyob lawm os mog

[Nkaujntxheedej]

Caij nplooj ntoos daj rhwb rhuv
Tseem nco ntsoov txhua hnub wb tuaj sib thuv
Hais lus ntxhi sib tawb sib hnia nkuj nki
Nyob ua ib ke saib lub hli
Nplooj ntoos poob daj vog rau hauv av
Tseem nco ntsoov wb niaj hmo nyob tham luag lis nyav
Saib tej me hnub qub cab sis niab
Txawm yuav ncaim ntev npaum twg los koj ib leeg thiaj yog kuv me nploojsiab
Tsov txaij nraum tsis tau nyiag kuv mus qhov twg li
Kuv tseem niaj hnub tuaj tu wb lub vaj tse huv si
Nyob tos koj txhua hnub
Mog tus neeg kuv hlub
Sib hlub sib nco tag npaum li no
Yuav ua licas ncaim koj mus tau na lod
Koj twb yog kuv nploojsiab cawm kuv txoj sia
Txawm lub hnub yuav poob pes tsawg zaus los yeej tsis muaj hnub tso koj cia li os mog

[cwjmemdub]

Sib nco ua luaj no
Vim yav thaum ub wb raug sib ncaim
Koj mus lawm ntsiag moo to
Los kuv lub plawv tsawm tshuav ib daim
Nyob tiam dhaum tiam
Twb tsis paub lwj
Tiam no kuv thiaj txhob txwm tsiam
Muab koj siab ntswj
Seb puas pauj tau
Kuv txoj kev nco
Muab koj coj los sau
Hauv siab kom siav nto
Yuav haus ntshav tes
Kom hnub ib tug tsis nyob
Thiaj rov tau los zes
Ua nkauj/nraug dab txob
Kom coj tau mus
Ntsib Yawm Saub ua ke
Mam rov cog lus
Los yug sib ze
Ua txij nkawm
Sib hlub txhua tiam
Los pab cawm
Neeg nriaj teb kev liam
Kom kev hlub
Yeej kev ntxub ces wb sia yuav tsis txawj tu os mog

[cwjmemdub]

Ntsib koj thaum twg xav hnov koj lub suab ntxhi
Zoo li thaum lub hnub hais rau lub hli
Thaum kuv suav cov nplooj qhua suav tsis txawj tag
Vim nws poob ntau npaum li los nag
Thov kom koj txoj kev hlub nyob mus ib txhis
Tsis txhob zoo li snow es yaj ntshawv ntshis
Koj tej lus qabzib ua rau kuv nco
Xav nyob hauv hmo qaim hli nrog koj txhua hmo
Nyob mus kom ntev ntau li cov nplooj qhua
Muab thaj chaw ntawm no ua wb chaw tshua
Lub zos PebHmong txawj hu wb tuaj sib cuag
Thov nws pab txhawb kom wb tau sib puag
Kuv mam ua tsaug rau Tswv Ntuj pom
Tias lub zos no xis nyob rau cov neeg tsim txom
Tuaj nrhiav kev hlub ua chaw deev siab
Kom muaj khub qhub kom nyob kiab
Kuv me Nkaujntxheedej ntshe yog zaj ntxhais
Nws thiaj zoo ntsej caj ntswm soob xais
Puas yog hmoov ntuj kuv thiaj ntsib koj
Siab nyob tsis tus niaj hnub tuaj ntoj
Nrog koj tuav tes taug txoj kev hlub
Ua tsaug Tswv Ntuj tsawm tso koj los pub rau kuv

[Nkaujntxheedej]

Sib hlub npaum li no
Tiam dhau los wb kev hlub raug txiav
Yuav tsis khiav koj mus ntxiv lawm
Thov tig khawm kuv kom ruaj ruaj
Seb puas muaj hnub wb sib tau
Los nyob ua lub neej ua ke
Vim tsis xav plam koj ntxiv mus
Txhua lo lus wb cog cia thaum ub
Tseem niaj hnub mob zwm
Los hais tsis tshwm qhia rau leej twg
Kua muag ntws luaj lub lwg
Tej phoojywg nug los hais tsis tau ib los
Tsuas pheej tos seb puas pheej hmoo
Rov ntsib kuv mi-nraug siab zoo
Kuv zoo siab heev uas tiam no
Ntuj rov tso kuv los nrhiav tau koj
Yuav kom tsis plam koj mus rau luag
Txawm ciaj tuag cia wb haus ntshav tes
Thaum plawv nres los wb thiaj tau uake
Nyob sib ze mus tag txhua tiam
Txawm hneev riam txiav wb kev hlub
Los tsis muaj hnub wb yuav sib nrug ntxiv
Wb yuav luag hiv hiv tuav tes nraim
Yuav tsis sib ncaim ntxiv lawm mog tus neeg kuv hlub

[/color]

[cwjmemdub]

Txawm ntuj yuav ntxeev teb yuav nphau
Siab tsis ntau yuav hlub koj ib leeg
Kuv qhov chaw ntseeg yog koj kev hlub
Yuav tsis pub nws ploj mus li
Txawm txiv nraug hli yuav ntsib niam nkauj hnub
Ib xyoos mam tau sib hlub ib zaug
Wb txoj kev taug yuav tsis sib ncaim
Cia wb muab qaim rau hauv nruab siab
Hlub mus ib txhiab li tau cog lus
Thov wb sib pus kom txog ntuj kawg
Ntuj yuav los lawg luaj li qe qaib
Kuv mam thaiv saib tsis pub koj tsim txom
Muaj kev cov nyom kuv ua tus daws
Muab wb plawv xaws sib lo ua ke
Thaum muaj xob nthe thiaj li tsis plam
Wb thiaj yuav zam dhau kev mob siab
Vim tiam no thiab lwm tiam lo hlub koj xwb
Yuav tsis pub swb txawm ntuj tsis kam
Kuv mam ua ib puas tsav yam kom ntuj hlub tshua
Cia wb sib yua ua wb lub neej
Peem mus kom tsheej rau ntau ntau tiam yavpemsuab

[Nkaujntxheedej]

Kuv paub tias koj hlub kuv heev
Koj lolus deev tau lub siab
Thiaj nyob kiab txhua hnub hmo
Tag tiam no tsuas thov hlub koj xwb
Kev hlub yeej tsis yeem swb rau leej twg li
Txawm Nraughli thiab Nkaujhnub tau sib cuag
Thiab sib puag ib xyoos ib zaug
Siab dawb paug ncaj ncees tos nws ib leeg
Thov koj ntseeg tias yeej hlub koj tiag
Lub xub ntiag yeej cia rau koj ua chaw so
Tsis hais ntuj no los ntuj sov
Yuav ua pam vov rau koj tsis pub koj no
Txawm lub ntiaj teb yuav kub hnyiab
Nplaim taws cig liab vog qhov txhia chaw
Yog wb ntawv saws los ua txij nkawm
Ces txawm yuav kub npaum twg
Los yuav muab dej ywg tua kom tau
Yuav tsis npau txawm neeg yuav cem
Los kuv yuav tsis rhuav tshem wb txoj kev hlub
Vim koj hlub kuv ua txhua yam
Kom wb kev hlub tsis txhob plam
Txawm lub ntuj yuav tsim txom
Los yawm saub yeej tsom saib kev ncaj ncees
Kuv ntseeg ib hnub yawm saub yuav lees paub
Thiab tau taub txog wb txoj kev hlub
Nws yuav rub wb kom tau los ua ib khub
Nyob sib hlub mus rau lub neej pem suab

[/color]

[cwjmemdub]

Thov kom muaj li koj hais
Ntuj yuav tsaus ntais los kuv mam ua koj lub teeb
Taws hauv yaj ceeb kom txog saum ntuj
Wb ob tug ntsuj sib tuav tes rawv
Nrog cua sib lawv txhua lub ceeb tsheej
Thaum noob neej tsis muaj tas
Wb mam tshuab ncas tsa txhua tus sawv
Rov los kawm phau ntawv wb qhia sib hlub
Kom lub hnub rov qab tawm tuaj
Lub hli kev quaj thiaj li yuav tu
Koj lub me plhu mos nyuj nyoos
Zoo ntxhi luj loos tej lus qabzib
Hais lus zoo dib kom tau koj lub plawv
Rau kuv puag rawv nyob hauv xubntiag
Yog muaj hnub nyiag tau koj lub siab
Ntuj tsaus ntuj tshiab yuav zoo ib yam
Yuav nrog koj tham tsis muaj caij xaus
Hlub koj kom laus plaub hau dawb paug
Txoj kev wb taug tsis pub muaj hmab hlua
Dawm tes dawm taw rau ncua wb sib sib hlub hauv yaj ceeb no

[cwjmemdub]

Kuv nyob saum roob rau hauv hav ntoo
Me kab noog nroo nruab hnub hmo ntuj
Lub siab xav yuj nrhiav koj lub plawv
Lub caij sawv thiaj mus nuam yaj
Ncig thoob hav paj seb puas ntsib koj
Thaum pom nas noj txiv ntseej txiv qhib
Nco koj tais dib ntxuag mov tsw ha
Zaum hauv qab ca ntawm daim teb npleg
siab mob ib teg cuag li raug phom
Txoj kev tsim txom tsis tau nrog koj nyob
Ua rau kuv mob twb mloog tsis tau
Koj tais zaub hauv nrog nqaij noog nas
Qab npaum nqaij chas las ci ntawm ntug cub
Wb kev sib hlub qab cuag suab thaj
Daim me tiab maj txog ntawm hauv caug
Tsho raug nag tsaug pom tawv dawb lias
thiaj li ntxias tau kuv plawv kiab
Nkauj Hmoob tojsiab lub siab ncaj ncees
Kuv yeej lees tias koj ntxim hlub
Yog ntuj muab pub thiaj tau ntsib koj
Tus me tsis loj tsis siab tsis puv
Nqa rawv tus hmuv chob ib lub plawv
Lub ntawd ces yog kuv lub ntag
Dej loj tsaws tsag los hla kom dhau
Pom koj xwb tsau tsis nco tshaib plab
Tau koj txhais npab los ua hauv ncoo
Ntshe yuav zoo zoo kuv lub siab tsis txawj tag