Mi Nraug dai siab
Txawm lub ntuj tsaus nti
Yuav pos huab niab
Kuv mam ua lub teeb ci
Mam ci rau koj txhua hmo
Tsis pub koj nyob ib leeg dub txig
Zaum txias to
Li no mus ib txhis
Kuv yeej hlub koj
Ntseeg kuv thiab
Kuv txoj kev hlub yuav coj
Kom koj rov los nyob kiab
Txoj kev hlub
Wb muaj tam sim no
Yuav tsis muaj hnub
Kuv muab koj tso
Muab koj lub siab tso plhuav
Rau kuv xib teg
Cia kuv mam fwj tuav
Yuav tsis muab koj tso tseg
Txawm koj txoj kev hlub
Yav tag los
Zoo cuag nyiaj thiab kub
Los nws yeej tsis tig rov los
Thov txhob muab tus kab mob siab
Zwm rau koj nruab plawv
Thiaj tsis ua rau koj nyuaj siab
Pw tsis xav sawv
Xav tias tom ntej
Tseem tshuav tus hlub hlub
Li leej muam Nkaujntxheedej
Yuav tsis ua siab dub mog Mi-Nraugdaisiab
Me nkauj dai siab
Tus hlub tas los
Yog kuv thawj tug
Nws muab kuv lub npe kos
Nrog nws lub siab sawv ntsug
Nws lub plawv
Muab rau kuv khaws rau nruab siab
Tsis pub neeg txawv
Nkag tau los ntiab
Vim ntuj tsis pom zoo
Thiaj li muab wb sib cais
Cia kuv niaj hnub nroo
Quaj qhov muag qawj ua taiv tais
Twb vim muaj koj
Los hlub los plhws
Txoj sia thiaj rov loj
Tsis mus taug txoj kev tws
Thiaj muab kuv lub plawv
Tso plhuav koj xib teg
Seb lub pajhlub puas txhawv
Tawg mus puv txhua ceg
Yog koj tua tau tus kab noj siab
Ploj ntais mus tsis muaj hnub tshwm
Kuv mam muab lag zeb los xiab
Ntsaws rau txhua lub qhov tshwm
Tsis pub kom lub plawv mob dua
Li yav tag los tsis muaj koj
Mam sau tag nrho txoj kev tshua
Nrog Nkaujntxheedej nyob tsis muaj hnub ploj