Kuv Mi~Nraug Daisiab
Txawm khwv khwv tsis tau so
Los txhua hmo pom koj zem zuag
Kuv tau puag nyob hauv nruab dab ntub
Tau sib hlub nyob rau hmo hli ci
Koj luag ntxhi khawm kuv duav
Nyob tsis dhuav txawm yog ib vuag
Twb zoo cuag li koj nyob ntawm ib sab
Tuav kuv npab cia kuv hnia koj tus ntxhiab
Lawm os mi-nploojsiab tus kuv nco
Koj txoj kev hlub nyob rawv
Hauv nruab plawv txhawb kuv lub zog
Kom muaj zog mus nrog luag khwv
Tes tawm hlwv los yeej tsis hnov mob
Muaj koj nyob hauv kuv nruab siab
Txawm tshav ziab los yeej tsis hnov kub
Nag los ntub los yeej tsis hnov no
Tsuav txhua hmo kuv tau ntsib koj
Hnov koj tej lus qab zib piam thaj
Ces kuv lub siab twb kaj lawm mog mi~NRAUG DAISIAB
Mi Nkauj Daisiab
Ntev ntev tsis pom nws tuaj
Cas nws yuav busy ua luaj
Txhob khwv khwv
tsam nws me tes me taw tawm hlwv
Me Nraug Daisiab hlub hlub nws
Tiamsis ho nyob tsis ze kom tau plhws
Yog nws nyob nrog Nraug Daisiab
Ntshe twb tsis pub kom tshav ziab
Thaum nag los yuav ntub
Twb yuav muab tsev kaus coj los rub
Ua chaw rau nws nkaum nag nkaum tshav
Yuav muab phuam so kom nws txhob paug plua plav
Kuv tus me neeg siab zoo
Thaum tsis hnov nws tuaj nroo
Ua rau kuv lub siab nyob tsis tus
Xav kom muaj tis ya plaws tuaj mus
Xyuas seb me Nkauj Daisiab puas noj qab nyob zoo
Yog tias hnov nws moo
Nraug Daisiab thiaj yuav nyob kaj
Tos nws tuaj hais nws tej me lus piam thaj
Deev Nraug daisiab lub siab
Seb puas yuav nyob kiab os me Nkauj Daisiab