Kuv Mi Nraug Daisiab tus kuv hlub
Lub sij hawm yuav dhau mus lawm ntev
Wb txoj kev hlub yeej tseem nyob li qub
Vim yog dej num ntau los tav kev
Thiaj tuaj cuag tsis tau koj li lub siab nyiam
Tabsis txoj kev nco koj mob zwm rawv nruab siab
Lub sijhawm yuav dhau mus pes tsawg lim tiam
Los kuv yeej nco ntsoov tias tshuav kuv Mi Nraug Daisiab
Koj nco kuv tshaj thaum noj niam mis
Kuv nco koj ces nco npaum tus neeg huam yeeb huam tshuaj
Tsis tau hnov koj tej mi lus qab zib ces txoj mi siav yaj ntshuj ntshis
Tsis muaj koj zaum ntawm ib sab lub siab yeej nyob tsis ruaj
Yeej yuav tuaj cuag kom tau
Kuv Mi Nraug Daisiab tus kuv nco
Vim nco koj dhau
Yog tias tsis pom koj hmo no
Hmo no koj tuaj wb yuav mus ncig saib hmoob yaj sab
Tsis hais nyob pem roob los tiaj nrag
Koj mam ua kuv ntej kuv mam lawv koj qab
Tham luag ntxhwb ntxhi li yav tag
Koj mam qwv nplooj kuv mloog
Kuv mam tshuab ncas ntxhi rau koj sab pob ntseg
Qhia seb wb sib nco npaum licas os Mi Nraug Daisiab
Mi Nkauj Daisiab
Lub hnub twb yuav poob tim npoo ntuj
Wb txoj kev hlub puas tseem nyob nruj
Thaum lub hli xiab wb txoj kev hlub qab npaum zib muv
Thaum lub hli nqig koj puas tsawm yuav rov tuaj thuv
Kuv nco koj tshaj nco leej niam thaum tsawm noj mis
Yog nraug noog nco nkauj noog npaud ces ntshe nraug noog twb tu tis
Tuaj kuv ev koj wb mus zaum pem roob
Mus saib neeg toj siab tej loo tej qoob
Mus sim pw teb thiaj tau zoo sib puag
Zoo kuv siab heev tau ua koj luag
Tsiaj xwb los twb paub sib nco
Qaug hlub nrog koj lawm tsis pom plawv thiaj yuav to
Puas yog kuv Mi Nkauj Daisiab noj tsis qab nyob tsis zoo
Nplooj qhuav tag poob pawg lug thaum mus txog ntawm wb tsob ntoo
Thaj chaw wb tuaj sib puag daws kev sib nco
Mi nas mi noog nqa pam los wb vov kom txhob no no
Hnub no kuv lub suab seev hu koj twb ntxhe mus thoob hav
Tsis pom tus swmzeej dabtsi yuav los tav
Tej lw kev tshwjxeeb sib hlub kuv zwm rau nruab plaw
Ntshe yog kuv Mi Nkauj Daisiab twb hnovqab wb tej mi qub chaw lawm