MNNN's Lonliness Heartaches

[MiNkaujNpaujNyiag]

In Here You Will Find Some Story,Letter,Mixes Of EveryThing That I'd Be Posting Up So Stay Tune!!!Hello Every PH, Buddie, <3 MNNN


1. K.M. (KoobMeej)-P.N, (Paj Nyiag)- Love Letter (Nkawv's TsabNtawvHlub)


2.Such A Beautiful Day Along With Cold Breezy

[MiNkaujNpaujNyiag]

Nyob Zoo P/N,

Tus kuv hlub thiab nco koj nyob li cas lawm xwb? Thaum peb lub tsheb npav khiav yees mus,kuv pom koj lub kua muag poob dawb vog ntxiv. Kuv hnov koj lub suab quaj thiab suab nyiavv nrog koj ob txhais tes dai lias tuaj rau kuv. Kuv ua tsis tau li cas tiam sis nrog koj sib tw quaj xwb Ua li koj hos nyob koj mam rov qab mus tsev lawm ? Yog kuv ntxov paub tias thaum ncaim koj lawm kuv yuav nco koj tag npaum no ces ntshe kuv twb tsis ncaim koj los li. Tej zaum koj yuav tsis ntseeg kuv tiam sis txoj niag kev ncaim zaum no haj yam ua rau kuv nco koj tshaj. Nco koj lub suab lua, no koj cov lus ntxhi niaj hmo tuav kuv lub npe hu tias koj hlub kuv. Nco koj ob txhais tes mos nyoos uas niaj hmo tuav kuv li ? Koj lub me suab luag, koj tus me ntxhiab thiab koj daim de ncauj ua rau kuv tsim dhuj dheev hauv nraub dab ntub. Koj daim pam kuv niaj hmo muab puag pw. P/N kuv tsis paub xyov yuav hais li cas rau koj, tiam sis lub niag neej nyob hauv Bangkok no, kuv tsis xav nyob li. Kuv xav kom peb muaj npe mus tsawg tsuag mus rau Asmeslika xwb,Peb los nyob rau ib lub tsev peb xab uas muaj cov neej tawg puv, Nyab Laj Nplog Hmoob, Co thiab Pub Thawj sawv daws los nyob ua ke, Peb cov hmoob los nyob rau xab ib. Sawv daws cia li pw cuag tsis li tej tsiaj ib plag, Txog caij noj mov ces sawv daws yuav mus lees thiam sib cab daws mus nqa mov noj, Tej zaub mov mas tsis qab kiag li thiab ua rau peb sawv daws raws plab coob kawg, Kuv xav kom peb muaj npe mus tsawg tsuag kuv tsis xav nyob hauv no li, Kuv niaj hnub niaj hmo xav txog lub neej yav tom ntej, vim yav pem suab, kuv yuav los tos koj mus nrog kuv nyob, Ua li koj nes koj ho xav txog dabtsi xwb ? Yog koj mus tau rau yav tom ntej koj paus yuav los cuag kuv li kuv xav thiab?

Kuv los ntsib koj li no xwb, nyob zoo tus kuv hlub. Nco ntsoov tias kuv niaj hnub niaj hmo tos ntsoov koj daim ntawv,

Sau npe : Tus hlub koj tshaj,
K/M Bangkok
P.S. Ua tsaug rau koj pob su

[MiNkaujNpaujNyiag]

Continue --->(P/N Reply To K/M)


K/M,

Ua tsaug rau koj tsab ntawv thiab koj cov lus zoo. Thaum kuv tsis tau sau ntawv rau koj mas kuv muaj lus ntau heev uas tsis muaj ib phau ntawv yuav ntim tas kuv cov lus li tiam sis cas thaum kuv zaum ntawm no, kuv tsis paub xyov yuav pib sau lo twg rau koj ua ntej. Qhov kuv paub zoo ces txiij hnub koj ncaim kuv mus lawm, kuv lub neej nws pauv lawm ntau. Yog koj xav paub saib thaum twg kuv mam rov los tsev tom qab nej lub tsheb ncaim peb mus lawm Kuv qhia rau koj paub tias, kuv nyob tos thiab tos saib koj paus rov qab los, tiam sis tos li cas los koj twb tsis rov los lawm. Tej tib neeg mus tsev tag kuv mam ua ib siab rov los tsev. Kuv lub cev lam los xwb, kuv tus plig, kuv cov kev xav, kev nco thiab txhua yam twb nrog koj mus lawm. Kuv tsis qab siab ua dabtsi li, mov los tsis xav noj, dej los tsis xav haus, kuv tsis zoo li ib tib neeg vwm, tiam sis kuv yog ib tug neeg vwm lawm.

Kuv tsis paub xyov kuv yuav li cas rau kuv tus kheej, Kuv nxtub thaum tsaus ntuj uas tav lub sij hawm koj tuaj xyuas kuv heev. Kuv pw ib leeg, tsim dhuj dheev hauv nraub dab ntub thiab ua yog toog hnov koj cov lus nraum qhov tsev ntxhi los rau kuv, Kuv yuav ua li cas ua neeg nyob os K/M? Yav thaum koj nrog kuv nyob, kuv tsis paub tias kev hlub mob li cas tam sim no nws mob npaum li ib rab riam nkaug.
K/M koj tsis txhob noog txog kuv rau yav tom ntej thiab saib tag kis yuav ua dabtsi ? Kuv tsis xav pom hmo tsis xav pom tagkis tsis xav pom lwm lub hlis thiab lwm xyoo, Yav tom ntej nws tsis muaj nuj nqis rau kuv. Yav tom ntej nws zoo li yog kuv tus yeeb ncuab, vim kuv yim xav ntau yim ua rau kuv nyuaj siab tais xyov hnub ntawv puas yuav muaj tiag.

Yog ua tau li siab xav, kuv xav ua kuv lub neej tig mus rov qab mus rau nag hmo, thiab mus rau yav tas los xwb, vim lub neej tiag rau kuvm yav tas los kuv thiaj muaj koj nyob hauv kuv lub xub ntiag yav tas los kuv thiaj yog koj tus thiab koj thiaj li yog kuv li. Yav pem suab yog ib txoj kev npua suav uas qhov tseeb mas ntshe muaj tsawg kawg. Koj yeej paub zoo, vim li cas kuv hais li no lawm Kuv tuaj ntsib koj li no xwb, nyob zoo koj pw zoo koj mog tus kuv hlub.

Sau Npe P/N

Nco Koj Heev

[MiNkaujNpaujNyiag]

Nyob zoo P/N tus kuv hlub,

koj tsab ntawv yuav hais tau ntxim hlub ua luaj. Thaum kuv nyeem tias koj nyob ib leeg saum roob tos kuv txog rau thaum kuv tsis los lawm tiag koj mam rov mus tsev, nws ua rau kuv kua muag los thiab hlub koj heev. Li cas los puam chawj, kuv xav kom ib tug tib neeg khov, txhob muab yav tas los xav ntau tsam nws rau koj mob, Yav tsas los cia muab ua ib qhov chaw nco , chaw dai siab thiab chaw kawm xwb mog. Tsis tag li ntawv kuv tsis xav kom koj xav txog lub neej tam sim no ntau xwb, vim yog ua neeg nyob tus twg xav lub neej tam sim no xwb, tus ntawv yuav tsis muaj lub zeem muag thiab lub neej yav pem suab nrog luag ua, Yog koj ua tau kuv xav kom koj ua lub neej tiag,

Kuv txhais hais tais, tib neeg yuav tsis txawj mus rov qab, los yuav mus tau rau yav tas los, Txhua leej txhua tus tsuas muaj mus lawm zuj zus xwb, Yog qhov no twb muaj tseeb tiag, thov koj muab qhov tseeb los nyob ua neej xwb, koj thiaj li xav ua neej mog. Kuv hais rau koj paub tseeb tais yog kuv tsis txog lub neej yav pem suab, ces kuv yeej tsis lam muab koj tso, muab kuv niam kuv txiv tso thiab muab kuv kwv tij tso pov tseg es tuaj ua ntsuag ciaj li no. Yog vim kuv xav tias lub neej yav pem suab muaj koj nrog kuv nyob thiab yuav muaj kuv niam thiab kuv txiv lawv sawv daws tuaj, kuv thiaj ua neeg nyob xwb, tsis yog li ntawv ntshe kuv twb mus dai tuag lawm.

P/N peb muaj npe mus Asmeslika lawm. Tag kis tsaus ntuj xwb peb mus lawm, hos thaum koj tab tom nyeem kuv tsab ntawv no ces peb twb nyob Asmeslika lawm tiag Kuv yuav mus rau siab kawm ntawv, khwv kom tau nyiaj thiab xa me los ntsis los rau koj thiab kuv niam thiab kuv txiv lawv tau siv, kom nej txhob txom nyem.
P/N, ua li ib ntus no Thiab paus zoo me ntsis lawm los tseem phem thiab khuj hmoob noj hmoob haus li yav qub ? Koj mus qhov twg koj ua tib zoo siab nawb mog Koj tsis txhob mus nqa txhuv saum roobm tsis txhob mus ib leeg mus da dej puag nram dej Naj Vaj lawm mog Kuv tsis tso siab rau koj kiag li. Xyaum xim txhua yam koj ua, kuv thiaj tsis nyuaj siab mog.
P/N, thaum kuv mus txog Asmeslikas, kuv mam sau ntawv thuab thaij duab los rau koj saib. Nco ntsoov tais koj nyob nraim hauv kuv txoj kev npua suav, Thaum tsaus ntuj kuv tsuas muaj koj los ua luag nrog lub hli, muab koj tus ntxhiab hauv wb daim pam los ntxias kuv tsaug zog, Thaum tsuas ntuj Koj yog kuv qhov chaw cia siab, kuv txoj kev vam thiab kuv lub zeem muag zoo rau yav tom ntej.

Sib ntsib dua mog yog koj nyeem daim ntawv no tas, muab nws ua koj chaw rau ncoo li ntawv wb thiaj yuav npau suav sib pom.

[MiNkaujNpaujNyiag]

Nyob zoo K/M Tus Kuv Hlub,

Kuv zoo siab heev uas tau txias koj daim ntawv thiab koj daim duab, Koj mus tau zoo noj tau zoo hnav, koj zoo nraug tshaj tuaj lawm, ceev faj thiab saib xyuas koj tus kheej zoo, tsis yog li ntawv ntshe kuv yuav ua cas khib mob siab. Thov txim kuv tsis tau teb koj tsab ntawv li sai tau, twb yog vim kuv tsis xis nyob. Tau ib lub liam tiam los no, kuv mob hnyav kawg li, Kuv niam thiab txiv lawv twb ua ob peb thaj neeb saib kuv, Ziag no kuv twb pib zoo lawm, koj txhob nyuaj siab dabtsi. K/M thaum kuv mob ntawv kuv tsis hnov tau ib hnub tseem lawm, tshuav kuv lub plawv dhia xwb. Thov txim, kuv tsis qhia tuaj rau koj paub, vim kuv tsis xav kom koj nyuaj siab, Tsis tas li ntawv los, koj nyob deb ua luaj, kuv twb qhia tau. Lub sij hawm kuv tsis hnov ntawv, Kuv nco ntsoov tias, kuv mus taug ib lub roob qhuav tshuav ntuj nrig. Kuv taug mus txoj saum lub laj roob, muaj ib tug yawg laus hanv ib ce khaub ncaws dawb nyob ntawm txoj hau kev tos kuv. Thaum kuv mus txog ntawm txoj kev tshuam, nws txawm sawv los tav kuv kev thiab hais rau kuv tias "Me ntxhais, koj los txog lawm no koj yuav tau los rho ob tug pas kuv tuav no saib koj rho tau tus ntev los tus luv" Kuv ntsia nws thiab noog nws tias. " Tus txiv ntxawm ua li tus pas luv thiab ntev txhais li cas tiag,?" "Yog koj rho tau tus pas luv mas nws txhais tias koj yuav tsum tau mus taug txoj kev no dua sab roob nrauv lawm. Txoj no mas koj mus, koj tsis rov los lawm." Nws hais thiab muab tus ntiv tes taws rau txoj kev do dus liab ploog ploj puag nraum lub roob lawm.
"Yog koj rho tau tus pas ntev ces kuv muab koj caij tus nees dawb nyob tov thiab xa koj rov qab mus koj vaj koj tsev." Kuv teb rau tus yawg ntawv tias "Kuv tsis rho, thov kom nws muab tus nees rau kuv caij xa kuv los mus kuv vaj kuv tsev xwb." Nws co tob hau thiab teb tias, "Me ntxhais txhau tus tib neeg los txog qhov chaw no yuav tau rho ob tug pas no thiaj tas. Tsis muaj ib tug twg yuav cia li xaiv nws txoj kev tau. Ob tug pas no yog tib neeg ntiaj teb daim ntawv noj ntawv haus." Kuv ua tsis tau li cas kuv quaj tias zaum no ces ntshe kuv yuav tsis tau pom kuv niam kuv txiv kuv tsev neeg, kuv cov phooj cov ywg thiab kuv tus hlub ua yog koj ib zaug ntxiv li lawm, yog kuv rho tau tus pas luv. Lub sij hawm ntawv, kuv niam lawv pom ntsoov kuv lub kua muag poob cuag tsis saum txaj.
Kuv ua ib siab qi muag nti ncav kuv txhias tes mus rho ib tug pas nyob hauv lub tog raj xyoob, Kuv rho tas, ua cas yog rho tau tus pas ntev. Tus yawg ntawv ntsia luag hnyav tuaj rau kuv tias, " Me ntxhais los ntawm no los ciaj tus nees no, kuv yuav xa koj rov mus tsev." Kuv nce kiag rau saum tus nees, nws ob nplawg tus nees pob tw, zoo li kuv tib plhaw hla kiag ib lub tsag dej tsaws tsag tawm plawvs rau sab tov. Kuv tsim dheev, pom zeem zuag peb lub qab nthab, pom kuv niam tuav raws ib txog phaum txias so kuv plhu. Hnov kuv niam lub suab hu tuav rawv kuv tes tias, " Me naib koj hnov lawm los."
Kuv tsis hais lus, tiam sis, co tob hau rau kuv niam tias, "Yog kuv hnov lawm os niam."
K/M tej zaum ntshe yawm saub paub tais kuv hlub thiab nco koj npaum li cas, nws thiaj ua kom kuv rho tau tus pas ntev, Koj paus xav li ntawv thiab?
Tus kuv hlub kuv tseem zoo tsis tau tau tiav. Kuv tseem caiv neeb nyob hauv tsev tsis tau tawm mus nraum zoo tsis tau. Txawm li cas los koj txhob txhawj mog, thaum koj txias tau daim ntawv no kuv twb zoo dua taw thiab tawm tau mus lawm. Kuv hlub koj.

Sau Npe : P/N
Nco Koj Heev

[MiNkaujNpaujNyiag]

Nyob Zoo P/N,

Thaum kuv nyeem koj ntawv tias koj tau mob nws ua rau kuv txhawj txog koj heev li. Koj zaj lus piav txog thaum koj mob ua rau kuv tsis tau hnov ib zaug zoo li ntawv li. P/N kuv xav tias qhov tseeb ces yeej yog tias yawm saub pom tau tias wb ib leeg nyob ib sab ntuj taim sis wb ob lub siab tseem nyob sib ze tshaj li, li no nwa thiaj li tsis xav cia wb ua ntsuag. Ntau zaum kuv mus nyob ib leeg thiab kuv ua tsaug rau yawm suab lub ntuj lub teb rau cov huab cov cua nws muab rau peb ua pa. rau tej xyoob tej ntoo nrog tej nroj tsuag thiab txhau uas muaj los yog peb txoj sia. Qhov tseem ceeb yog kuv niaj hmo ua tsaug thov qhov nws tseem tuav rawv koj cia rau kuv. Koj tsis paub, nag hmo kuv pw nti mus nti los tsaug tsis tau zog li. Kuv sawv xam ntsia mus dhau lub qhov rais, pom lub hli nra puag, ua rau kuv nco txog koj heev. Nco txog txhua hmo kuv tuaj zaum rau nraum nej lub muam kaum tsev nrog koj ntxhi hais lus. Tsis ntev ntawv koj tawm nrov khuav luagntxhi nqa daim pam tuaj cuag kuv. Koj tuaj muab kuv kauv kiag li ib leej niam muab nws tus menyuam kauv khaub hlab cia. Kuv puag koj ruaj muab koj hnia, muab koj tawb thiab hais lus nrog koj. Kuv rov los qhau cev pw txias to tsis muaj koj. Kuv cev tes mus tua lub teeb, pom koj luag ntxhi puag rawv kuv rau saum kuv lub rooj sau ntawv. Kuv ces los muab koj lub me ntsej muag plhws mus plhws los, los bws daws tsis tau kuv txoj kev nco koj ib pliag li. Kuv muab koj nthos nkaus nqa los nrog kuv pw, thiaj li qi taus qhov muag tsaug zog lawm. P/N, koj muab qhov nyiaj kuv xa nrog daim ntawv no los coj mus yuav ib qhov nqaij rau koj noj los sis coj mus noj ib ob taig fawm saum roob kom koj thiaj muaj zog tuaj. Koj tsis txhob yoo mov mog, kuv nyob tim no kuv thiaj li tsis nyuaj siab. Ua ntej kuv yuav ncaim koj mus, kuv xav qhia rau koj paub tias, kuv thov yawm saub thov poj yawm tswv koob thiab thov vaj tsawv txhua hmo kom koj txiv tsis txhob muab nej coj mus ua cob fab lawm pem ciam teb Nplog. Sib ntsib dua, kuv nco koj thiab kuv hlub koj.
Sau Npe : K/M

[MiNkaujNpaujNyiag]

Continue --->(P/N Reply To K/M)

Nyob zoo K/M,

Ib xyoo kaum ob lub hlis twb tig los yuav txog lub caij uas Hmoob tej tub tej ntxhais thiab tej niam tej txiv tos tshaj plawv. Tej tub tej ntxhais lub siab seev yuj yees tos ntsoov yuav mus dhia qaib, yuav mus pov pob thiab mus xaiv tus hlub. Tej laus los yuav mus nrhiav nyab nrhiav vauv li poj ua cia yawm ua tseg. Cov kwv tij Hmoob twb mus npaj txiav taws tos xyoo tshiab thiab khuab ncaws los twb npaj tau tag rau lawv tej menyuam yuav mus nqaum paj nquam nruas. Koj paus nco qab cov xyoo koj nrog kuv nyob es wb mus sib tw pov pob swb thiab sib lwv hais kwv txhiaj nrog lub xyoo tshiab, Kuv tseem nco ntsoov koj lub suab seev cov kwv txhiaj hais rau kuv mloog. Kuv tseem nco ntsoov thawj zag kwv txhiaj kuv hais rau koj nrog lub suab ntsee na thiab suab yuam kev. Kuv tseem nco ntsoov txhua hnub wb yog cov ua ntej mus txog tim tshav pob thiab cov lawv qab mus tsev nyob tim tshav qaib. Kuv tseem nco ntsoov koj os. Xyoo no tsis muaj koj txhua yam nws pauv lawm ntau Kuv tsis muaj siab thiab tsis tos kiag li txhua xyoo. Khuab ncaws los tsis npaj, pob los tsis xaws, kwv txhiaj los tsis kawm thiab kuv yuav tsis mus pov pob li txhua xyoo, vim mus los ntshe yuav nco txog ib tug thiab ntshe yuav tsis qab siab pov pob li. Qhov tseeb ceeb, kuv tsis xav mus pom luag tej pov pob hais kwv txhiaj lom zem, thiab tuav tes li txhua xyoo wb muaj dhau los. Kuv tsis xav mob ntxiv. Tsis tas li ntawv tsis muaj koj lawm ces lub xyoo tshiab no tseem yuav lom zem neeg tseem yuav coob npaum li cas los nws tsis muaj nuj nqis rau kuv lawm. K/M ntaus zaus kuv muab tib neeg lub neej xav, nws ua rau kuv tsis muaj peev xwm to taub li. Yawm saub tsim txhua haiv neeg los muaj cev nqaij daim tawv zoo txawv, tiam sis sab hnav sawv daws pauv leej zoo ib yam. Sawv daws txawj xav, txawj hlub, txawj mob, txhawj ntshaws, ib yam. Tiam sis vim li cas ib cov hos tsis tau txais tej kev ntawv li? peb cov Hmoob cov co thiab lwm haiv neeg tsawg tsis muaj kev phaj huam sib luag li cov haiv neeg uas muaj teb muaj chaw li Thaib thiab Nplog. Lub ntiaj teb no loj thiab dav ua luaj, tib neeg yeej nyob tsis thoob, tiam sis vim li cas, vim leej twg tib neeg thiaj muab cias muaj ciam teb caim av tas. Yog tias yog yawm saub cais mas nws ua tsis ncaj lawm rau cov haiv neeg tsis muaj teb muaj chaw, koj xav paus yog? Txawm li cas los kuv ntseeg tias yog tib neeg lub siab phem siab khib thiab siab coob muab lub ntiaj teb no sib cais xwb, yawm saub yeej tsis cais tib neeg li.

Kuv tuaj ntsib koj li no xwb sib ntsib dua lwm zaus Nyob zoo koj mog, tus kuv hlub.

Sau Npe : P/N - Nco Koj Heev

[MiNkaujNpaujNyiag]

Nyob Zoo P/N Tus Kuv Hlub,

Yav thaum ub puag thaum ntxov, lub ntiaj teb yog tsis muaj ciam teb thiab caim av thiab nws yog tag nrho txhua haiv neeg li. Yawm suab yeej tsis tau muab leej twg cais thiab yeej tsis tau kom tib neeg muab sawv dawv cais uas koj li kuv thiab koj pawg kuv pawg. Nws zoo li ib tsev neeg leej niam leej thiab leej txiv yeej cais tsis tau ntxub tej me tub me nyuam tiam sis yeej hlub sawv daws sib npaug. Tsuas yog tom qab thiaj sib ntaus sib tua txeeb liaj txeeb av thiab txeeb teb txeeb chaw xwb. Vim li no cov haiv neeg tsawg li Hmoob thiab lwm cov thiaj dhau mus ua ib cov neeg nyob tsis muaj tsw, tsis muaj teb muaj chaw, thiab thiaj mus qiv luag teb luag av nyob xwb. Haiv neeg lub npe tej txuj ci yog ib cov khoom plig uas zoo tshaj plaws los ntawm yawm saub tiam sis qhov tu siab tshaj mas yog thaum ib haiv neeg zoo li tus qaib ua mus qiv luag cooj pw, thaum no haiv neeg ntawv yuav tau xyaum li luag xav li luag, coj li luag hais li luag, thiab muab yus tug tso pov tseg zuj zus lawm. Vim zoo li no, ntau hiav neeg thiaj tau ploj lawv tej txuj ci thiab ploj lawv haiv tas
P/N, yog muab ua tib zoo saib los mas txoj kev txawj ntse vam meej yog ib tug dab phem tshaj plaws rau txhua haiv neeg. Vim tib txoj kev txawj ntse vam meej, tib neeg thiaj hloov lawm ntau. Cov ntse tsuas los tsuj cov raum thiab cov coob tsuas los khoo cov tsawg xwb.
Tsis hais tib neeg rov sib ntxub sib tua tib neeg, lub ntiaj teb no los puas ntsoog zuj zus lawm ntau rau txoj kev ntshe vam meej. Tej xyoob tej ntoo, tej nroj tsuag, thiab tej tsiaj los ploj haiv lawm ntau tag. Yav zoo li no xwb tom ntej tseem yuav paus ntsoog mus rau tib neeg txoj kev ntse vam meej lim haim no.
Txawm li cas los puam chawj, koj nco ntsoov tias txhua tus tib neeg yug los rau hauv lub ntiaj teb no yeej muaj nuj nqis ib yam, txawm tias lawv muaj teb muaj chaws nyob thiab tsis muaj. Nyob ntawm yawm suab tsw ntuj lub xub ntiag thiab qhov muag, peb sawv daws puav leej muaj phaj huam sib luag thiab muaj nuj nqis ib yam xwb. Tsaus yog tib neeg lub hwj chim muab sawv daws cais haiv thiab cais caj ces xwb.
P/N, hais txog ntawm peb Hmoob lub tshiab peb cuag koj tsis txhob muab koj kaw nyob ib leeg hauv tsev li koj hais ko. Txawm tsis muaj kuv lawm los, koj yuav tsum mus nrhiav kev lom zem thiab mus txhawb nqa Hmoob lub npe meej mom mog. Li hais los saum no. txhob cia peb Hmoob ploj peb tej txuj ci mus. Vim thaum ib haiv neeg twg ploj lawv tej txuj ci thiab lawv cov lusm haiv neeg ntawv ploj lawv haiv ntag.
Ib xyoo muaj ib zaug xwb cia l zoo siab hlo mus nquam paj nquam nraus. Cia li ntseeg koj tus kheej tias koj tsuas mus ua si xwb yuav tsis mus nrhiav dua lwm tus li kuv ntseeg koj.

Kuv hais rau koj paub zoo tias nyob ntawm peb no xav noj peb caug npaum twg los twb tsis tau noj. Hmoob tuaj tsawg muaj yim xwb zoo li twb tsis muaj haiv lawm ua dabtsi los quag zog kawg li, Xyoo no yuav yog thawj xyoo ua kuv tsis tau mus dhia qaib thiab pov pob lom zem ntshe lub xyoo yuav ntev heev. Koj mus pov pob ua kev lom zem pub rau kuv thiab mog.

Kuv los ntsib koj li no xwb, sib dua Nyob zoo koj mog tus kuv hlub

Sau Npe K/M

[MiNkaujNpaujNyiag]

Continue --->(P/N Reply To K/M)

Nyob zoo K/M, Tus Kuv Nco,

Kuv sauv ntsoov txij hnub koj ncaim kuv mus lawm, nws twb tau ib xyoo peb lub hlis thiab kaum ob hnub rau hmo no. Cas koj yuav ncaim mus lawm tiag tsis rov los li cov tib neeg nyob hauv no thiab. Kuv niam ua hnub ua hmo tos koj, ntsia ntsoov txoj xub ke thaum koj niaj hmo taug tuaj tham kuv los yeej tsis pom koj li.

K/M, koj tsis paub cov tib neeg nyob hauv yeej thoj nam tawg puv no ntxub lub niag neej txom nyemm, ntxub lub niag neej ruag Thiab khoo thiab ntxub lub niag neej tsis nrog luag muaj yav pem suab. Tiam sis hnub no kuv muab ua tib zoo xav txog lub niag neej nyob hauv nom kuv rov qab pom dua ib qhov zoo nkauj tuaj. Koj paus nco qab nej thiab peb yeej pluag tsis muaj nyiaj muaj txiaj, tsis nrog luag muaj noj muaj haus txuas, tiam sis txhua yam koj ntshaw koj twb tau yuav luag tag. Koj muaj koj niam koj txiv koj cov kwv tij, thiab koj twb muaj koj tus hlaus nkauj uas hlub koj tshaj nyob ntawm koj ib sab. Nyob hauv wb txoj kev txom nyem, wb twb muaj peev xwm nrhiav tau txoj kev hlub los tuav wb lub neej. Wb twb muaj tau txoj kev zoo siab kev luag los npog wb txoj txom nyem, zoo li wb lub neej twb zoo lawm hos ntau. Yav thaum, wb pluag nyiaj kuv phem tiam sis tsis pluag kev hlub. Nim no, koj zoo li cas xwb? Hos kuv ces koj txhob noog txog mog.

K/M, li hais los saum no, vim txoj kev txom nyem, ib lub hlis muaj ib pab neeg tuaj mus txawv teb chaws ib zaug, hos tej lub hlis mas tuaj mus lawm ob zaug. Feem coob yog lawv nej qab tuaj mus Asmeslika. Tiam sis nag hmo, muaj ib pab Hmoob tuaj mus rau Auvtaslis. Nyob rau hauv pab hauv hos muaj ib cov tuaj mus rau Fab Kis Teb.Asmeslika, Fab Kis thiab Auvtaslis paus yog ib lub teb chaws los sis paus nyob sib ze? Ua cas kuv yuav ntshaw nyob lawv qhov chaw ua luaj. Hnub twg kuv mam tau nce tsheb li lawv? Ua paus yuav muaj lub caij ntawv nes yom? Neeg tuaj lawm zuj zus lub niag yeej no twb pib nqhuab zuj zus thiab txias to lawm ntau. Nraub hnub tsis muaj neeg xav mus ua teb li lawm. Hmo ntuj tsis muaj hluas nkauj hluas nraug tuaj sib tham lawm. Kaj ntug qaib los tsis hnov quaj ntau lawm hos* los tsis tsem lawm thiab. Txoj kev ua thaum wb niah hnub taug mus da dej mas nroj tsuag tuaj txij hauv cuag thiab duav tag. Nram ntug dej nphob xwb xuav, hauv teh qab dej tsis pom ntses dhia tuaj yos kab noj, tiam sis ntxhuab ntsuab xwb xiab rau ub rau no. Tom zos kawg twb tsis muaj neeg nyob lawm ho nram ntug dej Naj Vaj los tsis neeg mus da dej zuj zus lawm thiab. Muab ua zoo ntsia mas tu siab kawg thiab tsis xav nyob kiag li lawm.
Cov neeg nyob tom zos kawg tsis tau luag ces lawv pib tsiv zuj zus los nrog peb nyob ua ke lawm. Lawv los nyob cov kwv tij Hmoob cov tsev khoom. Peb tsis ntev lawm xwb tej zaum yuav tau tsiv mus nrog koj niam koj txiv lawv nyob thiab.
Ua tsaug rau koj rab ncas mog txhua hmo, thaum kuv yuav tsaug zog, kuv muab los tshuab, nws pab tau kuv tsaug zog thiab muaj siab ua neej ib hnub dhau ib hnub.

Sib Ntsib Dua
P/N- Nco Koj Heev

[MiNkaujNpaujNyiag]

P/N

Txhua yam koj hais yog lawm ntau. Thaum kuv tseem nyob kuv muaj lub neej thoj nas txom nyem, wb tej chaw ua si thiab Hmoob lub neej saib tsis rau nqi. Ziag no, kuv mam paub tias, kuv nco txog txhua hnub thaum qhov chaw yuav luag cuag li kuv nco koj. Kuv nco txhua hnub thaum peb mus noj qhuav nram ntug dej Naj Vaj... Loj xov tej niag chaw ua ntsia pom ko taw mus tsis txog li lub niag roob siab pem hau Naj Vaj los nco tag nrho. Yog kuv ntxov paub tias txoj kev tsiv teb tsaws chaw yuav txom nyem siab npaum li no ces thaum kuv yeej ua ib siab nrog koj txom nyem ua ke ntshe yuav zoo dua li ziag no.
P/N, kuv xav qhia rau koj paub meej tias txoj kev hlub ziag no thiab thaum, nws yeej tsis txawv ntau rau kuv. Qhov txawv ces yog tsis muaj koj nrog kuv nyob xwb, hos txoj kev nws tseem ruaj nreeg khov kho li txoj thaum nyob tim ko. Koj tsis txhob xav ntau mog tsam nws ua muaj mob. Koj yeej paub zoo lawm tias ua neeg nyob txhua tus yeej muaj kev nyuaj siab nrog rau nws lub neej. Txoj kev nyuaj siab ntawv, nws ntau npaum li cov dej hiav txwv uas hais pov tseg npaum twg los yeej tsis tas li. Vim li no kuv thiaj xav kom koj muab qhov zoo los xav ua neeg xwb.
P/N, Fab Kis, Australia thiab lwm teb chaws tsis nyob sib ze li tej laus hais. Nyias nyob nyias ib lub ntuj thiab nyiaj yog nyiaj ib haiv neeg txawv dab tsaw qhua deb heev, Lawv daim tawv zoo ib yam tiam sis lawv cov lus txawv deb ib yam li Hmoob thiab Nplog mus rau Suav Li,

K/M- Tus Hlub Koj Ib Leeg.

[MiNkaujNpaujNyiag]

Continue --->(P/N Reply To K/M)
K/M,

Kuv niaj hnub niaj hmo, niaj hlis thiab niaj xyoo muab koj ua chaw nco. Kuv tsis paub xyov yuav ua li cas thiaj dim ntawm txoj kev xav txog koj thiab nco koj ntawv.

Nag hmo kuv rov qab mus txog nram ntug dej Naj Vaj, txog ntawm daim lag zeb uas thaum i wb niaj hnub mus zaum sib tham, txog ntawm ntug dej uas thaum i wb da ua ke, txog ntawm tsob ntoo uas thaum i wb nkaum ua ke, txog ntawv tus cav uas thaum wb zaum ua ke, thiab txog ntawm tej kev ua thaum i wb ob leeg taug. Thaum kuv qi muag, kuv tseem pom koj zem zuag ntawm kuv txoj kev xav. Kuv tseem hnov koj cov lus thiab koj lub suab uas koj hais tseg rau kuv. Kuv tseem nco tej lus wb cog tseg. Tej toj roob hauv pes, tej hav dej thiab tej pob zeb thaum wb sib cog lus ua ke tseem nyob li qub. Qhov txawv ces yog tsis muaj koj lawm xwb. Kuv mus sawv quaj thiab ncig wb tej chaw txhua kuv mam rov qab los lawm.

Hauv kuv lub siab yeej tsis kam lees txais qhov tsis muaj koj lawm, tiam sis kuv yuav ua tau li cas? Tsis muaj koj lawm, kuv lub neej puav lawm ntau ua luaj. Thaum koj tau cog lus rau kuv tias tus dej Naj Vaj no yuav tsis qhuav ib zaug zoo li wb txoj kev hlub. Kuv hais rau koj paub zoo tias, txij hunb koj ncaim kuv mus lawm, zoo li tus dej no tsuas muaj nqhuab thiab nqhuab lawm xwb. Kuv zoo li tus ntses nyob saum nraub nqhuab, zoo li tsob paj uas kab twb muab cov cag noj tas lawm, tos paj poob nplooj zeeg ces qhuav mus lawm xwb,

K/M, ntau zaus kuv xav mob hlwb tag los zoo li tsis muaj ib txoj hau kev rau kuv taug li. Kuv txias hais tias hlub nrog lub niag sij hawm uas yus nco npaum twg los tsis pom hlub npaum twg los tsis tau, es nws puas tsim nyog yuav hlub tiag? Kuv ntshai heev tias tsam muaj ib hnub, kev hlub dhau mus ua kab tshauj iab uas yuav los lom wb xwb.

Sib ntsib dua lwm zaus. Nco ntsoov tias P/N hlub koj ib leeg.

Sau Npe : P/N,

[MiNkaujNpaujNyiag]

Nyob Zoo P/N,

Koj tsab ntawv ua rau kuv txhawj txog koj heev li. Kuv thov koj tsis txhob mus ib leeg rau puag nram ntug dej lawm mog. Kuv tsis tso siab rau koj kiag li, koj yuav tsum los nyob twj ywm hauv tsev xwb.
P/N koj xav dabtsi li ntawv? Koj hais tias wb txoj kev sib hlub ntshe tsis tsim nyog hlub lawm, vim hlub npaum twg los twb tsis tau sib pom sib tau. Koj paus paub tias thaum ob tug neeg sib hlub tiag lawm, txoj kev hlub ntawv, nws tsis muaj ciam teb txawm yuav deb npaum twg los yeej hlub tau? Wb txoj kev hlub, nws tsuas nyob deb ib hnub caij dav hlau xwb, yog li ntawv, koj siab loj mog. Koj tsis txhob muab txoj kev xav phem los ua koj tus yeeb ncuab.Thov koj xav cov zoo xwb puas tau? Vim li no, nws thiaj tsis ua rau koj mob.
Kuv xav qhia meej rau koj paub tias wb txoj kev hlub zoo li tsob paj uas wb twb muab cog tau rau tom vaj paj lawm. Tsob paj ntawv twb tuaj loj hlob tawg paj lawm. Qhov teeb meem tsuas yog tias lub sij hawm ntuj no los txog lawm xwb. Thaum ntuj no, koj yuav tsum nkag siab zoo tias tsob paj yuav tau zeeg paj thiab zeeg nplooj mus raws li lub sij hawm, tiam sis tsis ntev xwb lub caij ntuj sov twb yuav rov tawm tuaj. Kuv ntseeg tau tias tsob paj ntawv cov cag tseem khov heev, paj tshiab zoo nkauj tshaj plawv cov thaum dua tuaj. Kuv cia siab tias txawm ntuj nag ntuj no thiab ntuj phem npaum li cas los koj cov cag yuav nyob khov kho tos kuv ntsoov lub ntuj sov li kuv cov thiab.


K/M hlub koj ib leeg
WI Asmeslika

[MiNkaujNpaujNyiag]

Continue --->(P/N Reply To K/M)

K/M,

Kuv cov cag yeej ib txwm khov thiab txog caij ntuj sov ces paj yuav tsum tawg tau zoo xwb, tiam sis zoo li lub ntuj no, yuav ntev ua luaj, xyov puas yuav muaj ntuj sov tuaj lawm os? Ib qhov kuv ntshai mas yog tias wb nyias nyob nyias deb tsam muaj ib hnib twg muaj lwm tus kab ya tuaj yaim tau raug lub paj ntawv lawm xwb. Wb nyias ceev tau nyias tus kheej, tiam sis, wb ceev tsis tau lwm tus paus yog? Zoo li yus ob txhias ko taw yuav ncaws thaum twg tsis paub, zoo li lub ntuj yeej tsis muaj leej twg qhia tau tias tag kis yuav tig mus li cas tiag.

K/M, koj li koj niam thiab koj txiv ib tug tub cag yuav los tuav tau koj niam koj txiv tus ncej dab. Kuv ces yug los ua ib tug ntxhais qhua ntxov tsis lig los kuv niam kuv txiv yuav muab quas mus rau sab nrauv.

Kuv tu siab tias koj lub neej thiab kuv lub nws txawv lawm ntau. Koj lub zoo li nthwv cua uas yuav ya mus qhov twg los tau,vim koj yog ib leeg tub. Kuv lub ces nws zoo li daim nplooj qhuav uas cua nplawv mus sab twg ces nws yuav tau ya mus sab ntawv xwb. Lub niag neej uas zoo li tus noog leeb nkaub raug mag kaw rau hauv tawb, yuav ya mus qhov twg los tsis tau, yuav tos saib tus tswv mus qhov twg ces mam tam mus qhov ntawv xwb.
Kuv hais tau rau koj paub tias tam sim no Thiab yuav muab lub yeej tog nam tawg puv no kaw tsis ntev. Cov tib neeg nyob hauv no yuav raug muab nyaib tawm mus nyob lwm qhov chaw. Muaj ib cov kwv tij Hmoob Hawj twb rov qab zom zaws mus ua cob fab lawm coob kawg. Kuv txiv mas tham muaj zog kawg rau zaj no. Kuv tsis xav rov qab mus ua lub niag neej rau hav zoov hav tsuag ntxiv lawm os K/M.

Peb twb txom nyem txaus lawm, yog txom nyem tshaj no ces tuag lawm xwb. Hais rau koj paub tias yog muaj lwm lub ntuj tshiab, yog muaj lwm txoj kev thiab yog muaj lwm yam ces kuv yuav mus taug kuv lub neej mog. Koj nyob pab thov yawm saub thiab fiv yeem kom kuv txiv tsis mus ua cob fab rau pem caim teb. Tsis yog li ntawv ces cua tshuab mus qhhov twg, daim nplooj qhuav ntawv yuav tau ya mus qhov ntawv.

P/N- Nyob ib leeg nco txog koj

[MiNkaujNpaujNyiag]

Continue --->(P/N Reply To K/M)

K/M,

Kuv xav tsis txog tias lub sij hawm zoo li no yuav los txog rau wb. Koj mus ua lub neej tau zoo noj tau zoo hnav, lam txom nyem hauv siab nco txog kuv xwb. Kuv nyob tim no, kuv lub neej puav lawm ntau thiab thov txim uas kuv tos tsis tau koj mog. Kuv hais li no, kuv txhais hais tais, kuv yuam kuv tus kheej mus yuav txiv lawmm vim kuv tsis xav rov qab mus ua lub neej nyob hav zoov hav tsuag rau pem ciam teb ua cob fab nrog kuv txiv lawv.

K/M koj yeej paub zoo tias nyob hauv lub ntiaj teb no, leej twg thiaj yog tus kuv hlub tshaj, leej twg yog tus kuv muab lub cev nkauj xwb rau thiab leej thiaj yog tus kuv hlub thiab nco mus txog hnub tsis muaj kuv. Tej zaum koj yuav tsis to taub thiab zam tsis tau txim tag rau kuv, tiam sis thov qi muag thiab muab koj los nyob kuv qhov chaw saib koj paus zam txim tau rau kuv li tsib caug feem pua. Koj twb paub zoo tias yug los ua ib tug ntxhais Hmoob mas lub neej no kuv ua hla koj thiab xaiv kuv lub neej yav pem suab rau kuv. Kuv tu siab ua lub ntuj lub teb muab wb cais li no. Zaum no ces,koj lub me suab luag, koj tus me ntxhiab thiab koj txoj me kev hlub tsuas yog npau suav lawm xwb.

K/M lwm tiam os mog kuv mam nco ntsoov rov los nrhiav koj, rov los ua koj ib zaug hlaus nkauj ntxiv thiab yuav los ua niam K/M puas tau? Yog tsis tau ces kuv kaum ob txog kev sib tshuam maub ntawv los rau ntiaj teb es wb mam los mus ua ke os mog. Ua li thaum ntawv,koj puas yuav paub kuv lawm? Koj puas yuav kam tuav kuv tes? Koj puas yuav hu kuv lub npe P/N thiab koj puas yuav kam lees txais yog kuv pom koj nyob rau saum kev sib tshuam sauv? Yog koj tsis paub kuv ces, kuv yuav ua ib siab thov yawm saub tsis txhob muab ntawv rau kuv los txom nyem rau ntiaj teb ntxiv lawm. Kuv yuav thov ntawv mus nyob rau ntuj ceeb tsheej, lub neej thiaj tsis muaj txob tsis muaj txhawj, tsis muaj mob tsis muaj nkees, tsis txawj laus tsis txawj tuag, tsis txawj tshiab tsis txawj nqhis thiab yuav tau lub neej zoo mus ib txhis. Yog koj los wb mam sib os mog.

Nyob zoo koj, zaum no kuv mus ces ntshe yuav mus lawm ntev. Thov khaws txoj phuam dab muag no lub cim tias P/N hlub K/M ib leeg xwb.

Sau Npe:
P/N- Sib ntsib dua mog

[MiNkaujNpaujNyiag]

Such A Beautiful Day Along With Cold Breezy (9-30-11)


Well  TGTIF!!!! Don't Know What Going Happen This Weekend Though So Well See What Up! Maybe Just Home Who Know... September Will Be Gone October Will Be Thin Air!!! Leave Are Fallin Of The Tree Love The Colorful Though Hopefully Every One Will Have A Great Weekend!!! <3 MNNN