Txoj kev ua zoo
Txoj kev ua zoo leej twg los yeej xav tau. Ib txwm thaum yau kuv yeej ua zoo rau tej neeg ib ncig kuv uas tsis vam dabtsi ntawm lawv kiag li. Kuv yeej txaus siab faib thiab muab kuv tug rau tus tsis muaj. Los txog rau hnub no, kuv kuj pom tej yam hloov ntawm txoj kev ua zoo. Muaj tej tug yus ua zoo thiab hlub lawv, lawv kuj nco yus txiaj ntsig thiab hlub yus rov qab. Muaj tej tug yus txawm ua zoo npaum twg los lawv yeej tsis pauj yus tej kev zoo rov qab rau yus los twb tsis pom tej kev yus pab lawv muaj nuj nqis.
Txoj kev ua zoo rau lwm tus tsis yog tau dawb los. Yus siv nyiaj, siv txiaj, siv dag zog, yus tshwj ziav yus lub sij hawm rau lawv, txawm yog yus tsis muaj thiab tsis tau los yus xum muab kiag ntawm yus xub ntiag rau lawv. Thaum kuv to taub txog hais tias kev zoo thiab kev hlub lwm tus tsis yooj yim li.....kuv xav paub hais tias yog yus qia dub thiab puas txhaum? Yog yus ua zoo thiab hlub lwm tus vim yus xav tau kev pauj rov qab puas yog? Yog yus pab tus uas yus paub hais tias nws yuav nco yus txiaj ntsig xwb puas yog?
Yuav xav li cas rau qhov no es thiaj li yog? Tej laus yeej ib txwm hais tias kom yus pauj luag zog es luag thiaj li pauj yus zog no. Ua li koj ho ua npaum li cas, es yuav ua npaum li cas thiaj li txaus?
Los yog.....yus twb ua zoo ib puas tsav yam es luag twb tsis pom muaj nuj nqis li, yog yus tseem tsis ua zoo li thiab ntshe luag haj yam tsis ntsia yus?