Kuv me nkauj hmoob, tus neeg kuv hlub tshua
Ntshe yuav tau ua ib siab tso koj ib zaug dua,
Tso zaum no ces ntshe yuav tso tag tiam,
Yog fab lwm muaj, mam li thov koj los ua kuv pojniam.
Tiam neej no, txawm sib hlub npaum cas,
Sib tshua npaum twg, los wb yeej koom tsis tau ib lub vas.
Txawm wb yuav seevsuab quaj nrhoo 8-9 lub toj,
Los kuv muaj kuv me tub, me ntxhais, kuv li poj.
Txawm wb yuav nyiav nrhoo 8-9 lub hav,
Los kuv muaj kuv kwv, kuv tij, kuv nee, kuv tsav.
Ces kuv me nkauj hmoob, tus neeg zoo,
Cia wb ua ib siab, es tias yog vim txoj hmoo.
Hnub 120 xyoo los txog, nco ntsoov hnav kuv lub me tsho,
Rau kuv txhais me khau noog, es wb thiaj li sib nco,
Kuv yuav hnav koj li me tsoos, rau koj li me khau,
Es lwm tiam wb thiaj li sib tau.
Nco ntsoov mog kuv me nkauj hmoob,
Tej lus cog, tej lus hais, wb daim ntawv nco kom thoob thoob,
Kavxwm, muajphauj, txiv dablaug yuav tsum los foom,
Es lwm tiam wb thiaj li ua tau lub neej los sib koom.
